Организацијата со назив „Независен студентски сојуз на УКИМ“ на својата фејсбук-страница информира дека денешното недозволување присуство на новинарите на студентскиот пленум било со цел „да се заштити приватноста“ на членовите, како и „непречено одвивање на работниот процес“.

Новинарите кои денес напладне дојдоа да го проследат јавно најавениот собир на студентите, на платото ги пречека студент со мегафон во рака, кој, веројатно грижејќи се за својата приватност, не се претстави. Тој само им кажа на новинарите дека нема да им биде дозволено присуството и дека ниту еден студент „не дал согласност за сликање“, по што новинарските екипи си заминаа.

„Пленарните седници на Пленумот се внатрешни работни состаноци на нашите членови, на кои се дискутираат и се донесуваат одлуки кои се однесуваат на функционирањето на Пленумот. Овие седници не се јавни собири и имаат за цел да обезбедат простор за отворена и слободна дискусија помеѓу нашите членови. Иако ја цениме улогата на медиумите во информирањето на јавноста, Пленумот одлучи да го ограничи присуството на медиумите на овие седници, со цел да се заштити приватноста на нашите членови и да се обезбеди непречено одвивање на работниот процес“, велат од очигледно новоформираната организација, чијашто бројност на членството не е позната, на страницата на „Фејсбук“, отворена пред три дена.

„Сепак, Пленумот е посветен на транспарентност и ќе продолжи да ја информира јавноста за своите одлуки и активности преку официјални соопштенија и други канали за комуникација“, пишува во објавата.