Независниот медицински синдикат в петок ќе поднесе кривична пријава против лица одговорни за нефункционалноста на системот на Фондот за здравство. Како што најави Горан Ристески од синдикатот, ќе побараат лична одговорност од лицата коишто се директно одговорни за оваа ситуација.

Кривична пријава ќе се поднесе поради непостапување. Во медиумите се пишува дека државата дала одредена сума за надградба и одржување на софтвер. Ние немаме корист од тоа, значи компаниите кои биле платени, имале за задача и да го одржуваат. Мора некој да понесе одговорност, таа услуга е платена согласно важечките стандарди. Имало тендер, аплицирале фирми и некоја фирма земала пари за таа услуга. Таа услуга е платена но таа услуга ја немаме од самото место, вели Ристески.

Д-р Дијана Јанкуловска на денешната прес-конференција потенцираше дека се револтирани од молкот на Фондот и тоа што ниту едно одговорно лице не излезе со официјална изјава.

Ние имаме разбирање и трпение, ако се случел каков било проблем или хакерски напад обврска е и човечка и морална да излезе и да каже во што е проблемот. Друго е информација од медиуми, друго е релевантна информација од тој кој е задолжен за сервисирање на ИТ секторот, каде ги има сите наши податоци, но и од осигуреници кои се многу чувствителни. Здравствениот систем во една држава е еден од главните столбови, кога ќе се случи крах во прашање е и стабилноста на една држава, додава д-р Јанкуловска.

Порачаа дека ќе бидат трпеливи и очекуваат решавање на проблемот до крајот на неделата.