На социјалните мрежи кружи необично видео од Кеопсовата пирамида, најголемата и најстарата од трите пирамиди во близина на Гиза, а воедно и најголемата во светот.

Видеото го снимил авантуристот Алекс Ланг, кој одлучил да ја „заобиколи“ древната градба со параглајдер.

Ланг се искачил над пирамидата на 14 октомври, а кога се доближил до врвот не можел да им верува на своите очи. Здогледал куче како се шета по камените блокови!

„Лаеше по птиците што летаа над неговата глава“, рекол Ланг подоцна.

Корисниците на социјалните мрежи останаа шокирани, а бројни светски медиуми ја пренесоа несекојдневната приказна.

Пирамидата во Гиза е висока 138 метри и е направена од големи блокови варовник, базалт и гранит, па многумина се обидуваа да сфатат како животното се искачило на врвот.

„Тоа е неверојатно искачување! Сосема лудо“, напишал еден, додека друг додал: „Сигурно му требало многу време“.

Многумина се пошегувале на сметка на приказната, пренесува „Дејли мејл“.

„Тоа е сега негова пирамида“, „Па, цел Египет е негов“, „Не е куче, туку Анубис (бог на подземјето, балсамирањето и задгробниот живот)“, гласеле некои од коментарите.

Wanı mutum ya hangı kare a ƙololuwar Dalar Giza ta ƙasar Masar ranar 14 ga watan Oktoba. pic.twitter.com/0oS1lmrH11

— TRT Afrika Hausa (@trtafrikaHA) October 17, 2024

Останува нејасно како животното се искачило на врвот, колку долго било таму и уште поважно – како се симнало. Видеото на Алекс Ланг не го открива тоа.

Искачувањето на Кеопсовата пирамида или на која било друга во Египет е забрането со закон. Поради оваа причина, многу туристи избираат да ја видат од параглајдер.

Камените блокови од кои е изградена биле тешки од два до четири тони (во просек 2,5, максимално 7,5).

Тоа е гробницата на фараонот од четвртата египетска династија Кеопс, а заедно со пирамидите Кефрен и Микерин претставува единственото сочувано античко светско чудо.