Израелскиот премиер Бенјамин Нетанјаху вечерва во обраќање до јавноста изјави дека Хамас ќе биде разоружан, а Појасот Газа ќе биде демилитаризиран. Неговиот говор доаѓа откако израелската војска потврди дека е ослободен дел од заложниците што ги држеше групата во Газа.

Нетанјаху нагласи дека ослободувањето било под влијание на комбинација од дипломатски и воен притисок.

– Во втората фаза, Хамас ќе биде разоружан, а Газа ќе биде демилитаризирана – или на лесниот или на тешкиот начин, но тоа ќе се постигне – рече Нетанјаху.

Премиерот изрази верување дека сите заложници од Газа ќе бидат вратени во „следните неколку дена“. Во својот говор, тој му се заблагодари и на американскиот претседател Трамп, кого го нарече „драг пријател“, за неговата воена поддршка на Израел.

Нетанјаху се обрати до јавноста на хебрејски јазик, а неговиот говор беше емитуван од израелските и меѓународните медиуми. Пораките за разоружувањето на Хамас и целосната демилитаризација на Газа претставуваат продолжение на стратегијата на Израел по месеци конфликт во регионот.