Израелскиот премиер Бенјамин Нетанјаху денес го критикуваше белгискиот премиер Барт де Вевер, нарекувајќи го „слаб лидер кој се обидува да го смири исламскиот тероризам со жртвување на Израел“, еден ден откако Брисел објави дека ќе признае палестинска држава.

„Белгискиот премиер Барт де Вевер сака да го нахрани терористичкиот крокодил пред да ја проголта Белгија“, соопшти кабинетот на израелскиот премиер во објава на социјалната мрежа X, додавајќи дека Израел „ќе продолжи да се брани“.

Владата на Израел го изрази своето незадоволство од најавите на Франција, Велика Британија, Канада, Австралија, а сега и Белгија, дека формално ќе признаат палестинска држава за време на состанокот на светските лидери во седиштето на Обединетите нации во Њујорк овој месец.

Претходно, министерот за надворешни работи на Белгија, Максим Прево, објави дека Белгија ќе се придружи на групата земји кои ќе ја признаат државата Палестина на овогодишната сесија на Генералното собрание на ОН и ќе воведат санкции врз Израел поради војната во Газа.

Признавањето на Палестина би било формализирано само ако Хамас ги ослободи сите преостанати израелски заложници земени во нападот на 7 октомври 2023 година и ако милитантната група „веќе нема никаква улога во управувањето со Палестина“, рече Прево, објави Политико.

Во меѓувреме, Белгија, исто така, ќе воведе „строги санкции“ врз израелската влада, објави белгискиот министер.

Прево рече дека двајца „екстремистички“ израелски министри, неколку „насилни доселеници“ и лидери на Хамас ќе бидат прогласени за „персона нон грата“ во Белгија.