Џез-музичарите Благојче Томевски (бас кларинет), Нинослав Спировски (тенор и сопран саксофон), Никола Коџабашија (клавијатури), Филип Букршлиев (гитара) и Дарио Циевски (тапани) на 5 август во „Буква“ ќе одржат концерт со наслов „Џез за чудаци“.

Оваа необична дружина музичари на сосема обичен и многу искрен начин ја дефинира музиката која ќе ја изведат на концертот.

– Музика за тие што пред влез оставаат храна за локалните мачки и тргнуваат во темелна потрага после секое известување за загубено милениче што ќе го забележат залепено на бандера или на поштенско сандаче; се однесуваат како побеснети ракуни секогаш кога ќе чујат милозвучна, логична и школски функционална хармонија и доволно добро ја познаваат етимологијата на терминот Џез за да бидат ужаснати од помислата за институционализиран ејакулат; не поседуваат условен рефлекс кој ги тера да се лигават кога ќе го чујат ѕвончето од Министерство за култура и највкусно им е кога теглите зимница во подрум ги обвиткуваат со страниците од популарните книги за самопомош; идеалниот психо-физички баланс го постигнуваат преку умешноста за носење папуча на боса нога и омилена активност за „разбибрига“ им е да го замислуваат Аца Лукас како врвен концертен пијанист; никогаш со светлата не им сигнализираат на возачите во спротивниот правец дека зад кривината чека полициско возило и секогаш, ама баш секогаш, во маркет ја враќаат кошничката на место за да може да ја користи некој друг… – се основните етички постулати на дружината која ќе свири „Џез за чудаци“.