Поранешната претседателка на Претставничкиот дом на американскиот Конгрес, Ненси Пелоси, изјави дека Демократската партија можеби би поминала подобро на претседателските избори доколку американскиот претседател Џозеф Бајден порано се откажел од својата кандидатура за реизбор.

Пелоси во изјава за „Њујорк тајмс“ рече дека можеби ќе имало други кандидати доколку Бајден претходно се откажал од учеството на претседателските избори и дека тогаш би биле организирани отворени избори во партијата, пренесува „Ројтерс“.

Пелоси тврди дека Камала Харис најверојатно би победила во таков процес и дека тоа би ја направило посилна на изборите.

– Но, тоа не можеме да го знаеме. Тоа не се случи. Живееме со она што се случи – рече Пелоси, која беше реизбрана во Претставничкиот дом.

Медиумите потсетуваат дека Пелоси ги предводеше напорите на Демократската партија да го повлече Бајден, што и се случи на крајот на јули по притисокот од партијата и лошиот настап на телевизиската дебата со републиканскиот кандидат Доналд Трамп, кој потоа и победи на претседателските избори.

Десетици илјади противници на Доналд Трамп ќе организираат протестен митинг во Вашингтон пред инаугурацијата на новоизбраниот претседател Доналд Трамп и неговите политички приоритети, кои според нив ќе ги поткопаат правата на жените, имигрантите, ЛГБТК+ заедницата и расните и верските малцинства.

Демонстрациите наречени „Народен марш кон Вашингтон“ се закажани за 18 јануари, два дена пред инаугурацијата, пишува Вашингтон пост (ВП).