Вечерва во МКЦ, со почеток во 20.30 часот, во рамките на придружната програма на 18.издание на Синедејс, ќе се случува промоција на книгата „Живот с иди(ј)отима“ (Život s idi(j)otima), автобиографска приказна на поранешниот басист на култниот панк бенд КУД Идијоти, Ненад Марјановиќ – д-р Фриц.

Книгата го опфаќа дискографски најпродуктивниот дел од кариерата на бендот, кој во текот на воените години се здоби со култен статус низ целиот Балкан, а антивоениот став и нескриен антифашизам ги рангираа „КУД Идијоти“ меѓу иконите на урбаната левица во овој дел од Европа.

-Книгата ја напишав затоа што сфатив дека една епоха дефинитивно е готова. Туста не напушти и со неговото заминување исчезна било-каква шанса „КУД Идијоти“ повеќе да постојат во било каква форма, вели Ненад Марјановиќ – д-р Фриц.

„Живот с иди(ј)отима“ е искрена и емотивна приказна за Пула, Истра, љубов, омраза, крај на еден систем и воспоставување на нов, крај на една и воспоставување на друга држава.

– Со пишување се занимавам од кога знам за себе, беше логично да напишам книга и некако да ја заокружам таа приказна за Куд Идијоти. Сè напишав, има можеби уште простор да се напише нешто повеќе за Туста и нашето влијание на бендовите во поранешна Југославија, но тоа ќе го одлучам кога ќе ја завршам оваа епизода, на пола пат сум со промоциите, – додава авторот.

Ненад Марјановиќ – д-р Фриц е новинар и коментатор на истарскиот портал „Regional Express“, уредник и водител на сатиричното телевизиско шоу „Систематски преглед“ и двигател и сопственик на истарската „Рок галерија“. Роден е во Пула во 1964 година.