Приватните превозници  и понатаму ќе возат само попладне додека не им се зголеми цената за превоз од изминат километар, која е непроменета од 2015 година и изнесува 69 денари за километар. Иницијативата за зголемување на цената беше повлечена од дневен ред на последната седница на Советот на Град Скопје, со образложение дека треба да се доработи. Затоа приватниците предлагаат средба со  ЈСП во поширок состав за изнаоѓање излез од кризата во која се наоѓа јавниот превоз, соопшти денеска на прес-конференција претставникот на приватните превозници Јофи Бус ДОО, Јовица Зафировски.

– Јавниот превоз во градот Скопје не е на нивото што треба да биде, затоа ние како приватни превозници решивме да предложиме до надлежните да се закаже состанок на повисоко ниво за да може да излеземе од оваа ситуација. Предлагаме до координаторите на советничките групи, Град Скопје, Владата на Р. Македонија, до сите стручни лица кои што се во јавниот превоз, ние приватните превозници, заедно со ЈСП да седнеме на еден проширен состанок за да најдеме излез од оваа криза. Јавно упатуваме апел што побрзо да се одржи тој состанок, за да можеме да излеземе од оваа ситуација, рече на прес конференција Јовица Зафировски, претставник на „Јофи Бус ДОО“, една од трите компании ангажирани од Град Скопје да вршат јавен превоз во главниот град.

Еден од проблемите со кој се соочуваат приватните превозници, Зафировски вели е цената за изминат километар.

– Како што знаете имаме повеќе проблеми, еден од проблемите е цената за изминат километар. На последната седница на Совет, иницијативата беше повлечена со цел да се доработи, затоа за да нема недоразбирања, најдобро е да се одржи таков тип на состанок, имаме повеќе од 200 автобуси кои не се искористени, едноставно со оваа цена ние не можеме да издржиме. Цената за изминат километар во моментов е околу 70 денари. Ние имаме направено анализа кај професорот Кастановски и Иво Дуковски која вели цената во моментов треба да биде, според цената на нафта, околу 120 денари. Сакам да додадам дека цената во Белград е 138 денари плус ДДВ, во Софија е 144 денари плус ДДВ, мислам дека и во Тирана е околу 130 денари плус ДДВ, рече Зафировски.

Според него, ЈСП има доспеан долг кон Јофи Бус ДОО од околу 8 милиони денари за  јули, август и септември. Зафировски нагласи дека тие, како приватни превозници, се обврзуваат нивните стари нееколошки автобуси да ги заменат со еколошки климатизирани автобуси, доколку се зголеми цената која им се плаќа за превоз по километар.