Нема ништо подобро од домашна супа со кнедли за неделен ручек. Лесни и меки како облак, кнедлите од гриз што пливаат во домашна супа се совршена увертира кон гастрономско задоволство. Ако вашите кнедли секогаш излегуваат тврди, пробајте го нашиот докажан рецепт и уживајте во совршениот вкус на супа со кнедли.

Нашите баби без промашување знаеја како да направат совршени кнедли за супа. Ниту премногу тврди, ниту премногу меки, само така можеа да ја претворат неделната супа во гастрономска гозба. Доколку сте нова домаќинка или сè уште не сте успеале да направите совршени кнедли за супа што ќе го воодушеват вашето семејство, пробајте го нашиот рецепт. Гарантираме дека кнедлите ќе бидат лесни, меки како облаци и ќе се топат во устата.

Состојки

1 јајце

5 лажици гриз

1 рамна лажица брашно

прстофат сол

30 грама путер

малку прашок за печиво

Подготовка

Одделете ја белката од жолчката, па матете ја со виљушка додека не се направи пенеста. Потоа додадете ја жолчката од јајцето и продолжете да матите уште две минути. Додадете ја солта, рамната лажица брашно, гризот и растопениот путер, а потоа и малку прашок за печиво. Продолжете да ја матите смесата за кнедли уште неколку минути, додека состојките не се соединат.

Поради прашокот за печиво, кнедлите малку ќе нараснат, а путерот нема да дозволи тестото да биде тврдо.

Земете една мала лажичка од смесата (потрудете се сите кнедли да бидат иста големина и форма) и пуштете ја во супата. Правете го ова додека не ја потрошите целата подготвена смеса. Гответе ги кнедлите околу десет минути, а кон крајот на готвењето, задолжително покријте го тенџерето и оставете ја супата да отстои уште пет до десет минути, за кнедлите убаво да набабрат.