Наставата во Воспитно-поправниот дом (ВП) „Тетово“ во Волковија не почна на 1 септември. Убавите училници таму фаќаат прашина, а во домот има деца – основци, но и малолетни лица кои треба да учат средно образование, објави порталот „Сакам да кажам“ (СДК).

Народниот правобранител веќе реагирал во Министерството за образование и наука (МОН), но оттаму го игнорираат и не му одговараат на реакциите што учебната година во Домот не почнува.

Образованието е основно човеково право, загарантирано со Уставот, право на секое дете, а непосетувањето основно и средно образование се казнува со закон, потсетува порталот. Државата, се додава во текстот, само ги затвора овие деца за сторени полесни кривични дела, а потоа не им дава да учат, односно да се ресоцијализираат.

Од Воспитно-образовниот дом „Тетово“ велат дека до МОН испратиле списоци на ученици кои треба да посетуваат настава од основно и од средно образование. Од институцијата велат дека таа има одлични услови за физичка и за онлајн настава, но и оти од Министерството зависи дали ќе има настава и кога таа би почнала.

На прашањето на „СДК.мк“ до МОН, односно до министерката Весна Јаневска, зошто сѐ уште не почнала настава за штитениците во ВП Дом „Тетово“ и зошто МОН го игнорирало Народниот правобранител кога праќал дописи и ургенции поради игнорирање на дописите, порталот досега не добил одговор.