Четворица пациенти на кои им се трансплантирани матични клетки в понеделник ќе бидат пренесени во новиот Центар за трансплантација на хематопоетски матични клетки кој денеска беше отворен на Клиниката за хематологија со 1 милион долари донирани од американската влада.  Хематолошките трансплантации не се одвиваат со листи за чекање, туку тоа е биолошка процедура во која пациентот се дијагностицира, се чека да нема знаци на активна болест и тогаш се пристапува кон трансплантација.

– Во моментот на Клиниката за хематологија има 4 трансплантирани пациенти кои се надевам дека од понеделник ќе ги префрлиме на новиот оддел кој ќе почне да функционира со полн капацитет, а има и десетина кои чекаат трансплантација, изјави директорката на Клиниката за хематологија, доктор Ирина Пановска Ставридис.

Таа додаде дека ентузијазмот на нашите граѓани не е голем за да се запишат во регистарот.

– Имаше кампања „Биди херој, биди срцевина“ која мора да заживее. Во Хрватска има 70 илјади доброволни дарители, а во Македонија само 5 илјади. Апелираме граѓаните да се запишуваат во регистарот. Навистина многу малку треба, да дојдат на Институтот за имунологија, само една епрувета крв, согласност и пет минути од времето и стануваат потенцијални спасувачи на живот. Оваа година имавме 2 донации. Македонски граѓани им спасија живот на Македонци без да се знаат меѓу себе и не беа роднини. Едната беше докторка, другата беше пациентка која се пријавила за да ја типизираат за да донира за нејзиниот болен брат. Меѓутоа не била идентична со братот туку со друг пациент. И тие двајца пациенти се добри, додаде доктор Пановска Ставридис.

Министерот за здравство Фатмир Меџити рече дека во соработка со поглаварите на верските заедници ќе се подига свесноста на граѓаните да донираат матични клетки.

– Да се избоирме, да спасуваме човечки животи, порача Меџити.

Според него, со проширените капацитети годишно ќе бидат лекувани 60 пациенти од Македонија и 15 лица од соседството, кои досега Клиниката немаше простор да ги прифати.

На Клиниката за хематологија денеска беше пуштен во употреба нов Центар за трансплантација на хематопоетски матични клетки со 1 милион долари донирани од Програмата за помош од европска команда на американската војска. Според најавите од раководството на Клиниката, ова значи воведување на највисоки светски стандарди за лекување на најтешките хематолошки заболувања.

– Новиот капацитет има најмодерна медицинска опрема со која може да се третираат 120 нови пациенти годишно. Станавме регионален центар за трансплантација кој освен за осигурениците на Македонија има капацитет да лекува и пациенти од Косово, Црна Гора, Босна и Херцеговина и Албанија, каде овие интервенции не се достапни. Планирани се 30 нови вработувања на медицински кадар, рече директорката доктор Пановска Ставридис.

Трансплантацијата на хематопоетски матични клетки е најсложена биолошка интервенција во хуманата медицина при која клетките на пациентот се заменуваат со матични клетки на здрав донор со што може да се излекуваат најтешките малигни хематолошки заболувања. За првпат трансплантација од сроден донор на Клиниката за хематологија е изведена во 2000 година. Новиот тераписки пристап со трансплантации на матични клетки од несроден донор и делумно идентични трансплантации се воведени во 2018 и 2019 година. Заради оваа придобивка пациентите веќе неколку години немаат потреба да бидат испраќани во странство. Од 2018 година извршени се 320 трансплантации, а од денеска оваа бројка се очекува да се зголеми двојно.

– Силно верувам дека новиот Центар за трансплантација на хематопоетски клетки ќе стане симбол за враќање на довербата во јавното здравство. На дело покажавме дека имаме потенцијал да одговориме на сите предизвици со кои се соочуваме. Сите ние во одреден период од животот стануваме пациенти. Но сега како лекари, достоинствено правиме историја во македонското здравство. Наша обврска е да го вложиме целиот расположлив потенцијал во унапредување на здравствените услуги. Можеме и ќе го сториме тоа за генерациите кои доаѓаат, рече Пановска Ставридис.

Заменикот шеф на Мисијата во амбасадата на САД во Скопје, Ерик Мејер изрази задоволство од реновирањето на Клиниката за хематологија и отворањето на Центарот.

– Овој проект за реновирање се одвива 3 години. Особено сме среќни што е завршен. Владата на САД донираше 1 милион долари за ова реновирање. Во минатите неколку години во здравствениот сектор владата на САД донираше 6 милиони долари, вклучувајќи медицински апарати и други работи кои директно им помагаат на граѓаните на Северна Македонија. Ова е рефлексија на посветеноста на САД кон Северна Македонија. Многу сме горди да бидеме ваши партнери и сојузници и подобри сме заедно, рече Мејер.

На отворањето присуствуваше и министерката за одбрана Славјанка Петровска.

– Задоволство ми е што денешниот настан покажува дека сојузништвото и стратешкото партнерство кое го изградивме со САД ги надминува сите граници и овојпат ја покажува својата хуманитарна димензија. Регионалниот центар за лекување хематолошки болести што го промовираме денеска ќе понуди лекување со најсовремените методи за нашите граѓани и доби поддршка од Европската команда на Армијата на САД која со донација од еден милион долари и со пари од буџетот на Северна Македонија овозможи да се реализира овој капитален проект во здравството. Центарот ќе биде од огромна полза за нашите граѓани, рече Петровска.