Саудиска Арабија потврди дека нема да биде дозволена продажба на алкохол за време на Светското фудбалско првенство во 2034 година, вклучително и во хотелите.

Принцот Калид бин Бандар Ал Сауд истакна дека земјата останува верна на своите културни вредности и не планира да ги менува за турнирот.

– Во моментов не дозволуваме алкохол. Забавата може да постои без алкохол – тоа не е 100% неопходно, а ако сакате да пиете откако ќе заминете, тоа е ваша работа, но ние во моментов немаме алкохол – рече принцот Ал Сауд.

Прашањето за достапноста на алкохолот предизвика дебата, особено по претходниот шампионат во Катар, каде правилата беа олабавени во одредени области.

– Не, алкохол воопшто нема да има. Исто како и нашата клима, ние сме „сува“ земја. Секој има своја култура. Подготвени сме да ги угостиме луѓето во рамките на нашата култура, но не сакаме да ја менуваме нашата култура за доброто на другите – заклучи тој.

Истовремено, Саудиска Арабија се соочува со критики за човековите права, додека организациите како Амнести интернешнал предупредуваат на можните негативни последици од одржувањето на овој голем спортски настан.