Нема абер од изградба на новата штипска болница, иако нејзиното отворање беше безброј пати пролонгирано и најавувано од 2018 година па се до денес. Наместо сечење на црвената панделка и отворањето на новиот објект, во јуни годинава Министерството за здравство го раскина договорот со грчката фирма „Интракат“, која досега беше изведувач на проектот. Според Министерството за здравство, „Интракат“ ги пробила сите рокови, досега завршила само 30 проценти од договорените работи и затоа договорот со нив е раскинат. Сега ќе се бара нова фирма изведувач, во нова постапка, односно тендерот одново ќе се спроведува. Во меѓувреме, активирана е банкарската гаранција од шест милиони евра. Министерот за здравство Фатмир Меџити во посета на штипската болница односно нејзиниот актуелен, стар објект, изјави дека како пациент не би сакал да се лекува таму бидејќи условите се катастрофални.

-Ги видов просториите, сум бил и порано тука како лекар, сум ја посетил болницата, ова навистина не личи на ништо и ова е 21 век и ние ќе направиме напори што побрзо новата болница да се заврши, рече Меџити по посетата на Штип во мај годинава.

Додека пациентите очекуваа нов објект каде ќе се лекуваат во клиничка болница, фирмата Интракат беше во судски спор со својот добавувач Бетон Штип, па откако ги расчистија сметките во вонсудска спогодба, повторно во јавноста беше информирана дека градбата ќе се одблокира и ќе продолжи. Новата болница во Штип беше во устите на кандидатите за градоначалници, со неа се фалеа министри за здравство, беше дел од сите предизборни кампањи, но никој не ја истера работата докрај.

Владата на почетокот на јули процедурално извести дека усвоила решение за динамично завршување на изградбата на новиот објект на Клиничката болница Штип со цел граѓаните да добијат клиничка болница по современи стандарди, особено што таму раобти високо стручен медицински кадар а се лекуваат граѓани од цел источен регион. Објектот е најавено дека ќе се простира на 34 илјади квадратни метри и дека ќе има 354 легла.

„Задолжени се Министерството за здравство, проектната единица и надзорот да подготват проект на изведена состојба, односно пресек на досега изведените работи во рок од 42 дена. Задолжена е проектната единица по направениот пресек на состојбата во соработка со Бирото за јавни набавки да подготви нова тендерска документација и да биде објавена јавна набавка во рок од 30 дена“, извести Владата по одржана седница на 4 јули годинава.

Градоначалникот на Штип Иван Јорданов учествуваше во медијација меѓу „Интракат“ и „Бетон Штип“ за да се одблокира изградбата на болницата но тоа не помогна на долг рок и сега ќе се бараат нови компании за да се финализираат 70 проценти од објектот. Пред тоа Банката за развој на Советот на Европа се повлече од проектот откако прва увиде дека динамиката за реализација на проектот е бавна. Така државата на друго место мораше да наоѓа 14 милиони евра за да ја заокружи изградбата.