Актерот Тимоти Шаламе се најде на мета на бројни критики поради неговото гостување во популарното шоу „Saturday Night Live“, пренесува „Пејџ сикс“.

Имено, Шаламе изведе скеч во кој го спомена поранешниот американски претседател Џими Картер, што не им се допадна на многумина.

Шаламе го играше ликот на инструктор за банџи-скокање, кој на учесниците во неговиот курс им задаваше вежби. Тие требаше да вежбаат како да пливаат, летаат, скокаат како жаби… А потоа популарниот актер извика „Џими Картер“, по што сите почнаа безживотно да висат на своите јажиња.

Видеото беше објавено на Јутјуб и веќе има милиони прегледи, но и негативни коментари на социјалните мрежи.

„Некој ќе оди во пеколот за ова“, „Ова 100 отсто беше негова идеја“, „Беше смешно, но коментарот за Џими Картер беше безобѕирен“, „Оставете го Картер на мира. Ова не ви беше потребно“, напишаа некои.

„Беше смешно сè додека не го спомена Џими Картер. Многу безобѕирно и несоодветно. И да, имам чувство за хумор и го сакам шоуто, но ова беше ужасно… Се надевам дека неговото семејство не го видело ова“, „Скечот беше смешен до делот со Картер“, се согласуваат други.

Инаку, Шаламе важи за најголемата ѕвезда на генерацијата зет и е еден од ретките актери кој добил две номинации за Оскар пред да наполни 30 години.

Актерот е номиниран за улогата на музичарот Боб Дилан во биографскиот филм за него, „Целосно непознато“ („A Complete Unknown“). Филмот го опишува доаѓањето на легендарниот музичар во Њујорк во 1961 година и како се носел со годините слава што следеле потоа. Покрај Шаламе, во филмот глумат Едвард Нортон како Пит Сигер, Бојд Холбрук како Џони Кеш, Моника Барбаро како Џоан Баез, Ел Фанинг како Силви Русо и Ник Оферман како Алан Ломакс.

Ако Шаламе успее да го освои Оскарот, ќе влезе во историјата како најмладиот добитник на престижната статуетка, надминувајќи го рекордот на Адријен Броди од 2003 година, кој тогаш освои Оскар за улогата во филмот Пијанистот, на возраст од само 29 години.