Хрватската фудбалска сцена овој викенд ќе биде сведок на кулминацијата на едно од највозбудливите првенства во последните години. Тимот на Риека се наоѓа на чекор до освојување на втората титула во клупската историја и сам ги држи конците во своите раце. Доколку слави над Славен Белупо на домашен терен во недела од 17 часот, титулата заминува на „Рујевица“, без разлика на резултатите на главните ривали, Динамо Загреб и Хајдук.

Во пресрет на последното коло, Риека и Динамо имаат по 62 бодови, додека Хајдук заостанува само два, со 60. Но, за разлика од нив, Риека не мора да гледа во „туѓ двор“, победа им е доволна за златниот пехар.

Очекувано, интересот за натпреварот е огромен. Стадионот „Рујевица“, со капацитет од нешто над 8.000 гледачи е распородаден и многумина кои останаа без билет, сега се обидуваат да најдат начин да бидат дел од фудбалската историја, па дури и по висока цена.

На „црниот пазар“ се нудат билети за источната трибина по цена од дури 250 евра, иако официјалната цена изнесуваше 20 евра за членовите на клубот и 40 за останатите.