Швајцарскиот парламент го одобри нацрт-законот за одобрување на истополови бракови што доаѓа по неколку години од многу други западноевропски земји, јави дописникот на МИА. Швајцарците, сепак, треба да го кажат последниот збор, затоа што партијата на Федералниот демократски сојуз (УДФ), мала формација која ги брани христијанските вредности, веќе побара да биде распишан референдум.

Граѓанскиот брак за сите, досега беше усвоен од двете собраниски комори по повеќегодишна процедура. Пвичниот нацрт беше поднесен од Зелената либерална група во 2013 година.

Усвоениот текст им овозможува на хомосексуалците и на лезбејките да стапат во брак, а вторите да имаат пристап до донирање сперма, една од најконтроверзните точки. Досега, истополовите парови можеа да склучат „регистрирано партнерство” што не им даваше исти права како брак.

– Ова е историска победа за правата на ЛГБТ заедницата, реагираше „Амнести Швајцарија“ преку твит.

Здружението „Фамиј Арк-ен-сиел”, основано во 2010 година за одбрана на интересите на хомо родителните семејства во Швајцарија, посочи дека се подготвува за референдумот што е најавен од УДФ.

– Ако противниците започнат референдум, ние сме подготвени, изјави Матијас Ерхарт, потпретседател на националниот комитет создаден за референдумот на почетокот на декември.

– Имаме 82 отсто од населението зад нас и благодарение на мобилизирачката сила на ЛГБТ заедницата, нашите партнерски организации и политичките партии кои нè поддржуваат. Ќе можеме дополнително да го зголемиме прифаќањето на ЛГБТ лицата во општеството благодарение на ова кампања за гласање, рече тој.