Репрезентацијата на Бразил синоќа славеше во второто коло од јужноамериканските квалификации за СП 2022 против Перу со 4:2, а посебна приказна е секако одличниот Нејмар (28) кој со хет-трик беше херојот на „кариоките“.

Со тие три гола играчот на ПСЖ направи чудесен подвиг. Тој стигна до 64 погодок во репрезентативниот дрес на 104 настапи за Бразил и на вечната листа на најдобри стрелци го престигна Роналдо Назариo да Лима, „Ил Феномено„.

За овој голем подвиг му беа потребни шест натпревари повеќе од Роналдо, но доколку продолжи во ваков ритам Нејмар би можел да ја подобри уште повеќе својата статистика.

Пред Нејмар е само славниот Пеле, кој постигна уште 13 голови и Нејмар е на добар пат да стане најдобриот стрелец на Бразил на сите времиња.

Следниот меч Бразил ќе го има на 12 ноември 2020 година во третото коло против Венецуела, а пет дена подоцна ќе има тешко гостување кај Уругвај.

Најдобри стрелци на Бразил:

1. Пеле, 77 голови на 92 натпревари

2. Нејмар, 64 голови на 104 натпревари

3. Роналдо, 62 голови на 98 натпревари

4. Ромарио, 55 голови на 70 натпревари

5. Зико, 48 голови на 71 натпревар