Постојаниот замор, и покрај доволно сон, свеж воздух и физичка активност, е еден од најчестите и најсилни симптоми на недостаток на железо. Луѓето со ваков дефицит често се чувствуваат безволно, истоштено и без енергија, пишува „Живим“.

Освен хроничниот замор, недостатокот на железо може да предизвика главоболки, опаѓање на косата, испукани агли на усните, тешкотии со концентрацијата, зголемена осетливост на инфекции и видливо бледило. Овој дефицит, ако се занемари, може речиси незабележливо да предизвика немир во телото, а на долг рок – анемија.

Посета на лекар е задолжителна

За да се спречи анемија, важно е навреме да се консултирате со лекар. По анализа на крвта, докторот ќе препорача соодветни додатоци на исхрана.

Но, рамнотежата може да се поврати и преку правилна исхрана, особено со внесување на храна богата со железо како што се црвеното месо, тиквини семки, ленено семе и спанаќ. За максимална ефикасност, следете ги овие совети:

• Железото од животинско потекло (црвено месо) се апсорбира многу полесно од она од растително потекло.
• Витаминот Ц ја подобрува апсорпцијата на железо – испијте чаша свежо цеден сок од портокал заедно со оброкот.
• Кофеинот ја попречува апсорпцијата на растително железо – сведете го на минимум.
• Избегнувајте млечни производи додека консумирате месо – тие ја попречуваат апсорпцијата на железото.
• Не земајте железо заедно со други минерални суплементи, бидејќи можат меѓусебно да си го поништат дејството.

Доколку внимателно ги следите овие препораки, со индивидуално прилагодена терапија ќе можете да ја вратите рамнотежата на железо во телото за четири до шест месеци. Потоа, одржувајте ја преку урамнотежена исхрана и внимателно следење на знаците што ви ги испраќа телото.