Во последно време, Битолската пошта се соочува со голем недостиг на поштари.

Недостигот на поштари е изразен особено во последниот месец поради малиот број на поштари, и добар дел од поштенските услуги се извршуваат со задоцнување, што предизвикува револт кај битолчани.

-Точно е тоа дека во последно време имаме реакции од граѓаните за ненавременото доставување на поштенските услуги, но тоа се должи на недостигот на поштари. Ние постојано имаме отворен конкурс за прием на поштари, но, за жал никој не се јавува-вели директорот на Битолската пошта, Пеце Кондовски.

Според него, во моментот недостигаат неколку поштари и добар дел од некои реони во Битола ги  „покриваат“ со прераспределба на поштарите.

Инаку, еден поштар без стаж во Битолската пошта по договор на дело може да заработи 20 илјади денари месечно. Кој сака да биде поштар во Битола, може да се јави уште од денеска, а од утре да почне на работа, велат од Битолската пошта.