Обвинителката Вилма Русковска ја коментира денешната одлука на дисциплинската комисија во ЈО, со која се препорачува таа да биде разрешена од обвинителската функција.

Во изјава за „Макфакс“, поранешната шефица на Обвинителството за гонење организиран криминал и корупција вели дека не смета оти е поразена и најави борба.

„Ќе се борам до крај со сите средства“, вели Русковска за порталот, додавајќи дека одлуката била донесена одамна, уште кога таа била на сослушување во Обвинителството.

„Со самото неприфаќање на мои сведоци и докази, знаев која е одлуката. Знаев дека е донесена“, вели обвинителката.

Русковска влезе во судир со поранешниот директор на Управата за финансиска полиција, Арафат Муареми – кадар на ДУИ, лани летото, кога нареди претрес на просториите на Финансиската полиција. Муареми беше дел од предистражна постапка на Јавното обвинителство за гонење на организиран криминал по кривична пријава поднесена од Државното правобранителство за конфискацијата на имотот на бизнисменот Сеад Кочан, но од ОЈО ГОКК тогаш тврдеа дека кривичната пријава била поднесена од група граѓани и се однесувала за друго, но не открија за што.

Муареми јавно се пожали дека бил под притисок и дека одлуката за претрес во просториите на Финансиската полиција била донесена со неправилности. Главниот обвинител Љубомир Јовески ја суспендира Русковска и две нејзини колешки, а Муареми кратко по скандалот поднесе оставка на директорската функција во Финансиската полиција. Неколку месеци подоцна, за прв човек на Обвинителството за гонење организиран криминал и корупција дојде Ислам Абази, за кого во јавноста се појавија информации и фотографии од кои се заклучува негова блискост со Али Ахмети и повеќе високи функционери на ДУИ.

Русковска вели дека не ја добила одлуката и не може да ја коментира, но е децидна дека не се кае што не отишла во пензија, со што би спречила да бид е разрешена или казнета на друг начин во дисциплинската постапка.

Таа за „Макфакс“ додаде и дека не смета оти случајот против нејзе е политичка нарачка, туку „борба помеѓу правото, правдата и неправдата“.

Јовески ја суспендира Вилма Русковска, дисциплинска постапка против уште две обвинителки