Поранешната шефица за Јавното обвинителство за организиран криминал и корупција, Вилма Русковска, вели дека не му замерува на републичкиот јавен обвинител Љубомир Јовески за тоа што тој ја суспендираше од позицијата, откако ја пријави поранешниот директор на Управата за финансиска полиција, Арафат Муареми.

„Не сакам да ја губам енергијата на лутење, не сме мали деца“, рече Русковска вечерва во „Топ тема“ на Телма, додавајќи дека Јовески и го честитал роденденот.

Сепак, таа одби да коментира околу тоа дали одлуката за нејзинo суспендирање можеби се должи на актуелните амбиции на Јовески да стане уставен судија, за што во Собранието му треба поддршка од ДУИ, чијшто кадар е Арафат Муареми, кој во меѓувреме се повлече од директорската функција во Финансиската полиција.