Не се заборава најголемиот успех на кошаркарите: Промовиран документарниот филм „Леле, луѓе, што направивме, радувај се Македонијо“
Денеска беше промовиран документарниот филм „Леле луѓе што направивме, радувај се Македонијо“ со кој се одбележува десетгодишнината од најголемиот успех на македонската кошаркарската репрезентација, која го освои четвртото место на Европското првенство во Литванија.
Препорачано
Насловот на документарниот филм, всушност се легендарните зборови на Владо Илиевски кој ја постигна одлучувачката тројка на 11 секунди пред крајот на натпреварот со Литванија (67:65) во четвртфиналето на Евробаскетот.
– Филмот е инспириран од најголемиот успех на една македонска репрезентација на големите натпреварувања. Снимен е во две продолженија, а на него работеше една мотивирана, млада, но искусна екипа. Идејата е на уредникот на порталот Кош.мк, Љубомир Ошавковски, а несебична поддршка дадоа Кошаркарската федерација на Македонија (КФСМ), Македонскиот олимписки комитет (МОК), Агенцијата за млади и спорт (АМС) и уште неколку комерцијални спонзори кои ја препознаа идејата и делото кое останува за идните генерации како презентација на тој голем национален успех и големата национална радост што се случи во 2011 година.Телевизиската премиера на документарниот филм ќе се одржи на 13 и 14 ноември, од 20:45 часот на Телевизија 24 – изјави извршниот продуцент на филмот Сотир Сотировски.
На промоцијата на филмот учествуваа и тогашниот селектор Марин Докузовски, тогашниот претседател на МКФ, Даниел Димевски и еден од предводниците на репрезентацијата на Евробаскетот 2011, Тодор Гечевски.
– Како да се подзаборави резултатот од Литванија, среќен сум што ќе се потсетиме на овие убави моменти. Овој филм ќе не потсети на сè што се случуваше тогаш. Ќе остане запишано како најголем успех на македонскиот спорт – изјави Марин Докузовски.
Гечевски кој сега е спортски директор во КФСМ, смета дека со документарниот филм „Леле луѓе што направивме, радувај се Македонијо“, младите ќе видат дека може да се постигнат врвни резултати.
– Во нашите сеќавања, ЕП 2011 ќе остане до крајот на животот, а младите ќе може да видат дека и ние можеме да бидеме со врвни резултати – вели Гечевски.
