Мажите кои консумираат одредени пијалaци се под поголем ризик од губење на косата, открија експертите. Лекарите откриле дека опаѓањето на косата е за 30 отсто почесто кај оние кои редовно пиеле енергетски пијалaци и засладени кафе и чај.

Експертите од Универзитетот Цингху во Пекинг откриле во истражувањето дека мажите кои пиеле повеќе од еден засладен пијалак дневно имаат 42 отсто поголеми шанси да страдаат од губење на косата во споредба со оние кои не консумирале такви пијалаци.

Во просек, мажите кои пријавиле губење на косата пиеле 12 засладени пијалаци неделно. Исто така, истражувачите ги набљудувале навиките на повеќе од 1.000 Кинези на возраст меѓу 18 и 45 години во период од четири месеци. За тоа време, тие морале да ги пријават своите навики во исхраната, како и историјата на нивното ментално здравје. Меѓутоа, истражувањето не ги проучувало само пијалаците.

Утврдено е и дека мажите кои консумираат повеќе брза храна и јадат помалку зеленчук имаат поголема веројатност дека ќе оќелават. Тие навеле и дека анксиозноста исто така го зголемува ризикот. Како решение, експертите претходно изјавија дека здравата исхрана е клучна за бујна коса и спречување на опаѓање на косата.

Дерматологот од Лондон, д-р Шерон Вонг, рекла: „Клетките на фоликулите на влакната се втори најбрзо делливи клетки во телото и ги бараат сите хранливи материи од добро избалансирана здрава исхрана.

„Ова вклучува немрсни протеини, добри јаглехидрати и масти, витамини и минерали, но не постои единствена храна за косата. Недостатоците во исхраната и неуспешната диета се честа причина за истенчување и опаѓање на косата“, објасниле експертите.

„Бидејќи косата не е суштинска структура за преживување, телото не дава приоритет на употребата на хранливи материи за раст на косата“, објаснила д-р Вонг.

Во повеќето случаи, нема причина за загриженост, но понекогаш тоа може да биде знак за здравствена состојба, се наведува во упатството.

Лекарите наведуваат дека е нормално губењето на косата, додавајќи дека можеме да изгубиме помеѓу 50 до 100 влакна дневно, без да го забележиме.