Новото истражување открива дека шимпанзата развиле многу пософистициран и посложен комуникациски систем отколку што се верувало претходно, кој содржи елементи слични на основите на човечкиот јазик.

Како што откриле научниците, шимпанзата користат неколку механизми кои комбинираат вокално огласување за да создадат нови значења, а овие елементи на комуникација личат на некои од основите на човечкиот јазик, пренесува „Ен-би-си њуз“.

Во студијата, научниците анализирале снимки од три групи шимпанза кои живеат на Брегот на Слоновата Коска во Африка. Истражувачите откриле дека овие примати комбинираат звуци за да комуницираат на сличен начин како што луѓето користат идиоми или го менуваат редоследот на зборовите за да создадат ново значење за израз.

Ова е првпат научниците да документираат таква сложеност во нечовечки комуникациски систем. Научниците веруваат дека оваа способност на шимпанзата претставува еволутивен премин помеѓу комуникацијата со животните и човечкиот јазик.

Посебна студија, објавена минатиот месец, дојде до слични заклучоци, докажувајќи дека друг вид примат, бонобото, исто така може да комбинира звуци за да формира нешто слично како реченици. Научниците дојдоа до нови откритија следејќи групи шимпанза на терен 12 часа на ден, снимајќи ги гласовите и звуците што ги испуштаат.