Научници од Германија откриле хемиско соединение од печурка кое би можело да ја носи титулата „најгорчливата супстанција позната на човештвото“. Тоа е една од трите нови молекули изолирани од печурката Amaropostia styptica, за која се вели дека и покрај тоа што не е отровна не може да се јаде токму поради нејзината екстремна горчина.

Откритието доаѓа од соработката на два научни института – Институтот „Лајбниц“ за биологија на прехранбени системи во Фрајзинг и Институтот „Лајбниц“ за растителна биохемија во Хале. Резултатите беа објавени во февруари во списанието „Journal of Agricultural and Food Chemistry“.

Меѓу трите нови соединенија, истражувачите посветиле посебно внимание на таканаречениот олигопорин Д. Оваа молекула може да ги активира човечките рецептори за горчлива арома, познати како TAS2R, веќе при концентрација од само 63 милионити делови од грам на литар. Споредбено, тоа е како да пуштите еден грам во сто кади полни со вода, а сепак да добиете горчлив вкус.

„Нашите резултати придонесуваат за проширување на знаењето за молекуларната разновидност и начинот на дејство на природните горчливи соединенија“, изјави д-р Мајк Беренс од Институтот „Лајбниц“ во официјално соопштение. „На долг рок, ваквите откритија би можеле да го отворат патот за развој на прехранбени производи кои не само што се привлечни за сетилата, туку се и корисни за варењето и чувствотона ситост.“

Она што го прави овој труд посебен е фактот што е првиот што систематски анализира соединенија од печурки преку тестирање на функционални рецептори за горчливост. Истражувачите нагласуваат дека разбирањето како и зошто ја откриваме горчината може да помогне во голем број области, од исхраната и медицината до еволутивната биологија, пишува Gizmodo.

 

View this post on Instagram

 

A post shared by Krystian Kozłowski (@nextormagazyn)