Во виралното видео на ТикТок, со повеќе од 10 милиони прегледи, студентката по неврологија, Емили Мекдоналд, зборува за три работи што ги прави секој ден за да го заштити својот мозок. Таа практикува да не го користи телефонот наутро, размилсува позитивно и избегнува преработена храна, пишува „Инсајдер“.

Според невролозите Џејсон Шеферд и Талија Лернер, советите кои младата Мекдоналд ги дава во нејзиното видео не се лоши, но, велат дека има многу повеќе начини за одржување на мозокот здрав и науката стои зад тоа. Во продолжение прочитајте ги советите кои ги даваат научниците со кои може да го одржувате својот мозок млади здрав.

Квалитетен сон

Практикувањето добра рутина во спиењето, шест до осум часа секоја вечер е една од најдобрите работи што можете да ги направите за здравјето на вашиот мозок.

Спиењето му помага на мозокот да процесира нови информации, да формира сеќавања, да ги зајакне новите концепти и идеи и да ги отстрани токсичните акумулации на протеини познати како амилоидни плаки, кои вообичаено се акумулираат во мозокот на луѓето со Алцхајмерова болест.

Спиењето, исто така помага да се зголеми пластичноста на мозокот, способноста на мозокот да се прилагоди на новите ситуации и искуства. Колку повеќе вашиот мозок може да се прилагоди на новите предизвици, толку повеќе можете да ја подобрувате и зачувате когнитивната функција како што стареете.

Бидете активни

Научниците велат дека секојдневно треба да вежбаме за да го одржуваме својот мозок здрав, бидејќи редовното вежбање го зголемува протокот на крв во мозокот, а силното срце помага да пумпа доволно крв во мозокот, за да продолжи да работи оптимално.

Истражувањата покажале дека луѓето кои редовно вежбаат имаат помал ризик од развој на Алцхајмерова болест, а вежбањето исто така може да го одложи когнитивниот пад како што луѓето стареат.

Официјалната препорака е 150 минути неделно умерено вежбање, но сепак секогаш кога можете да го поттикнете вашето тело да се движи е подобро отколку воопшто да не сте активни. За научниците тоа значи и прошетка со своите кучиња неколку километри еднаш или двапати дневно или други лесни активности.

Комуницирајте со пријателите

Осаменоста може да му наштети на менталното здравје, емоционалната благосостојба и здравјето на мозокот на една личност,, па затоа е важно да останете поврзани со другите.

Генерално, луѓето со силни социјални мрежи имаат тенденција да живеат подолго. Поминувањето време со други позитивни луѓе е добро за вашиот емотивен живот, што е добро и за здравјето на мозокот.

Истражувањата покажуваат дека силните социјални врски исто така можат да го намалат ризикот од депресија и анксиозност и да им помогнат на луѓето подобро да се справат со тешкотиите.

Да останете поврзани со другите може да биде предизвик, особено како што старееме, па научниците предложуваат користење на социјални медиуми и апликации за пораки за да се олесни контактот со саканите. Волонтерската работа е исто така добра за вас.

Пробајте нови работи

Изложувањето на нови луѓе, места и предизвици може да го одржи вашиот ум остар, да ја подобри пластичноста на мозокот и да го зајакне вашиот мозок.

Човекот треба да ужива да се занимава со хоби надвор од неговата работа, како на пример со фотографија, читање книги или слушање класична музика. Пробувањето нови работи, не мора да значи дека треба да потрошите пари на патување или да започнете ново хоби.

Може да биде едноставно како обид за тешка загатка што не сте ја направиле досега или да се ставите во нови социјални услови каде што вашиот мозок може да научи да се прилагодува на различни луѓе.

Јадете здрава храна

Како што истакнува младата Мекдоналд во своето видео на ТикТок, преработената храна е поврзана со когнитивно опаѓање и зголемен ризик од деменција.

Многу студии покажаа дека високо преработената храна, како пакуваните производи или помфритот, може негативно да влијае на целокупното здравје и да го зголеми ризикот од здравствени состојби, како што се дијабетес, висок холестерол или висок крвен притисок.

Овие болести влијаат на различни органи на различни начини, но генерално може да му наштетат на целото тело, вклучувајќи го и вашиот мозок.