Научниците од Универзитетот Кембриџ открија дека хипоталамусот, клучна регија која делува како „центар за контрола на апетитот“ на мозокот, е значително поголем кај луѓето кои имаат вишок килограми, како и дека нездравата исхрана може да предизвика воспаление во оваа област на мозокот, што доведува до структурни промени.

Тоа воспаление, велат научниците, може да ги „наруши“ природните механизми одговорни за одржување стабилна телесна тежина, што им отежнува на дебелите луѓе да го контролираат гладот ​​или да спроведуваат диета, пишува британски „Тајм“.

Студијата, која беше објавена во списанието „Неуроимиџ“ (Neuroimage), е спроведена врз основа на испитување на 1.350 млади луѓе со различна тежина, а тимот открил дека вкупниот волумен на структурата на хипоталамусот во мозокот е значително поголем кај луѓето со прекумерна тежина и дебелина.

Утврдено е дека колку е поголем индексот на телесна маса на еден човек (БМИ), толку е поголем волуменот на неговиот хипоталамус.

Инаку, хипоталамусот е со големина на бадем и игра важна улога во контролата на апетитот со тоа што управува со ослободувањето на хормоните кои ни кажуваат дали сме гладни или сити.

Авторите на студијата истакнаа дека не можат да бидат сигурни дали вишокот телесна тежина предизвикува зголемување на големината на хипоталамусот или дали луѓето со поголем хипоталамус се склони да јадат повеќе.

Студиите врз животни покажаа дека исхраната богата со масти предизвикува воспаление на хипоталамусот, што, пак, предизвикува отпорност на инсулин и дебелина.

Водечкиот автор д-р Стефани Браун рече дека ако ова е случај и кај луѓето, тоа би значело дека исхраната богата со масти може да предизвика воспаление во центарот за контрола на апетитот, што би ја променило нашата способност да процениме кога сме јаделе доволно и како нашето тело го обработува шеќерот во крвта, што доведува до дебелеење.

Студијата покажа дека се чини дека нездравата исхрана предизвикува воспаление во мозокот што може да влијае на зголемувањето на хипоталамусот.

„Иако знаеме дека хипоталамусот е важен за одредување колку јадеме, всушност, имаме мошне малку директни информации за оваа регија на мозокот кај живите луѓе. Тоа е затоа што е многу мал и тешко е да се воочи на традиционалните МРИ скенови на мозокот“, рекла Браун, додавајќи дека дополнителното истражување за улогата на хипоталамусот е од витално значење за разбирање на дебелината.