Руски научници тврдат дека за првпат успеале да снимат разговор меѓу делфини.

Двајца возрасни црноморски делфини по име Јаша и Јана разговарале неколку минути во базенот во кој пливаат 20 години, не упаѓајќи си еден на друг во збор. Научниците го снимиле нивниот „разговор“ и сега веруваат дека успеале да препознаат „зборови“ и „реченици“ во тој материјал, пишува „Си-ен-ен“.

„Всушност, оваа размена на информации навистина наликува на разговор меѓу луѓето“, изјавил Вјачеслав Рјабов, истражувач од резерватот Карадаг на Крим.

Делфините користат два различни типа на комуникација за да комуницираат – свирежи и кликови, познати и како пулсирања.
Користејќи нова опрема за снимање звук, Рјабов ги разбил поединечните „некохерентни импулси“, од кои секој звучел различно и по времетраење и по фреквенција.

„Имајќи го тоа на ум, можеме да претпоставиме дека секој пулс претставува фонема или „збор“ во таканаречениот делфински јазик“, напиша д-р Рјабов.

„Бидејќи овој јазик ги има сите карактеристики на постојниот човечки говорен јазик, се чини дека делфините имаат високо ниво на интелигенција и се свесни“, се вели во трудот, објавен во списанието „Физика и математика“ на Политехничкиот универзитет во Санкт Петербург.

Во својата работа, Рјабов покани и други научници да создадат уред кој ќе овозможи комуникација меѓу луѓето и делфините.

„Луѓето мора да го направат првиот чекор во формирањето врска со првите интелигентни жители на планетата Земја, преку создавање уреди за надминување на границите на комуникација меѓу делфините и луѓето“, вели д-р Рјабов.

Другите научници се малку повнимателни во правењето такви проценки.

Џошуа Смит од Универзитетот Мардок, кој не бил вклучен во студијата, верува дека се потребни повеќе истражувања за да се потврди дека делфините навистина разговараат како луѓето.

„Мислам дека е премногу рано да се избрзува со заклучоците дека делфините користат јазик сличен на човекот“, рече Смит.

Американскиот научник не негираше дека објавените резултати се возбудливи, но оцени дека е неопходно истите резултати да се добијат и во природата.