Полицијата денеска уапсила човек кој се обидел да внесе мачета во центарот за посетители во Капитол во Вашингтон, јави „Асошиејтед прес“.

Во американскиот законодавен дом во моментов е изложен ковчегот со телото на поранешниот американски претседател Џими Картер, а редици луѓе секојдневно чекаат за да му оддадат почит на експретседателот, кој почина неодамна на 100-годишна возраст.

Според полицијата, апсењето се случило околу 14 часот по локално време, откако рендгенската контрола на влезот во Капитол покажала дека еден од посетителите имал мачета во чантата.

Човекот, чијашто возраст не е соопштена, веднаш бил уапсен, а освен мачетата, во чантата му нашле и три ножеви.

Осомничениот се товари за неовластено носење опасно оружје, соопшти полицијата.