Основното јавно обвинителство Кавадарци ја отфрли кривичната пријава против две лица од селото Пепелиште кои се снимаа како фрлаат кучиња во реката Вардар.

Граѓанската иницијатива „Ние за благосостојба на животните/We for Animal Welfare“ поднесе кривична пријава против овие лица, наведувајќи дека „ваквите дејствија се крајно нехумани и се спротивни на природата и потребите на кучињата како вид, факт кој може да потврди и вешто лице од областа”, а воедно овие факти се и научно поткрепени со Кембричката декларација за свесност на животните, донесена на 7 јули 2012 година, како и член 2 од Законот за заштита и благосостојба на животните.

-ОЈО Кавадарци преку јавниот обвинител м-р Ненад Јосифов, без да побара мислење од вешто лице, ниту да ја консултира науката, сам ќе оцени дека кривичната пријава е неоснована, дека во случајот не станува збор за мачење животни и дека „нема место за јавнообвинителска интервенција“ – велат од граѓанската иницијатива.

Со непреземањето службени дејствија односно покренување на обвинение за сторено дело „Убивање и мачење животни“ од член 233 од КЗ, тие велат дека јавниот обвинител, несомнено, го одобрува ваквиот монструозен чин и го охрабрува повторувањето на ова дејствие.

Анима Мунди: Насилникот кој фрлаше кучиња во река живее во Данска, дали и таму би го сторил истото дело?