Напнатоста и нервозата не се ништо невообичаено во овој стресен свет во кој притисокот од сите страни постојано расте. Секој од нас има денови кога стресот толку се засилува што ни се чини дека целосно ќе нѐ надвладее. Кога мислите ни „трчаат со брзина на светлината“, може да биде тешко да пронајдеме начин да забавиме и да се сконцентрираме во сегашниот момент. Но, она што секогаш може да помогне е шолја топол чај кој ја намалува напнатоста и нервозата, и ги „смирува нервите“, како што би рекле нашите баби, пишува „Е-клиника“.

Во некои култури, приготвувањето чај е возвишен ритуал

За жал, една шолја чај не може да ги излечи сите наши грижи. Животниот притисок и стресот и понатаму ќе бидат присутни, но дури и во таа трка можеме да се потпреме на методи и мали ритуали кои ни помагаат да ја пронајдеме неопходната смиреност и да се соочиме со предизвиците без да бидеме преплавени. Не е случајно што некои култури го издигнале приготвувањето чај до свет ритуал.

Напнатоста и нервозата се „смируваат“ со мешавини од лековити билки со опуштачко дејство
Постојат многу природни алтернативи кои можеме да ги избереме за да пронајдеме момент на тишина и да ја одбиеме напнатоста и нервозата. Лековитите билки кои се дел од смирувачките чаеви содржат: иридоидни монтетерпени – валепотријати, тритерпени, сесквитерпенски кетони и киселини, стероли, цијаногени гликозиди и леукоантоцијанидини. Исто така, присутни се и алкалоиди, гермакранолиди, полиацетилени, флавоноиди, танини, скроб, етерични масла (богати со проазулен и ментол), органски киселини и шеќери. Активните состојки делуваат опуштачки на организмот, а смирувачки на нервниот систем. Често придонесуваат и за ублажување на грчеви, подобрување на варењето, намалување на болки, како и нормализирање на зголемен крвен притисок.

Чај од маточина за смирување

Овој чај е добар за смирување, но и за ублажување на менструални тегоби.

Потребно:

• 10 г цветови и листови од маточина
• 1 литар вода

Маточината се прелива со врела вода и се остава поклопена околу 10 минути. Потоа се процедува. Се пијат 2 до 4 шолји дневно.

Чај од нане

Потребно:

• 1 до 1,5 лажица листови или цветни врвови од нане
• 1 шолја вода

Нането се прелива со врела вода, се поклопува и стои околу 10 минути. Потоа се процедува. Се пијат 3 до 4 шолји дневно.

Напиток од валеријана за жени со „слаби нерви“

Во народната медицина, коренот од валеријана се користи за смирување на нервите, особено кај жените.

Потребно:

• 200 г ситно сечкан корен од валеријана
• 1 литар јака комовица

Сечканиот корен се става во голем тегла (2 литри) и се прелева со комовица. Смесата стои 8 дена и неколкупати на ден се промешува со дрвена лажица. По 8 дена се процедува. Се зема по 20 капки на коцка шеќер неколкупати дневно. По секоја доза, се пие чаша вода со лажица мед.

Чај од лаванда за „нервозно срце“

Доколку сте вознемирени, имате проблем со нервозно срце или грчеви во стомакот, народната медицина го препорачува овој чај.

Потребно:

• 1 лажичка цветови од лаванда
• 1 шолја вода

Цветовите се преливаат со врела вода, се поклопуваат и по 3 минути се процедуваат. Се пијат 3 шолји дневно.

Чаевите и природните напитоци за смирување се препорачуваат за луѓе изложени на секојдневен стрес, луѓе кои се соочуваат со нервоза, напнатост или повремени нарушувања на спиењето. Сепак, постојат ограничувања за нивна употреба – особено кај бремени жени и доилки, на кои не им се препорачува консумација на вакви чаеви.