Британскиот музичар Џон Ленон напиша многу култни песни додека беше дел од групата „Битлси“, но една едноставно не можеше да ја поднесе.

Никогаш не се срамеше да го изрази своето искрено мислење и често најострата критика ја зачувуваше токму за своите песни. Меѓу нив беше и „Mean Mr. Mustard“ од студискиот албум „Abbey Road“ од 1969 година. Ленон беше остар и критичен, ја нарече „ѓубре“. Песната е инспирирана од новинска приказна за човек кој се обидува да го сокрие своето богатство за да спречи другите да го натераат сè да потроши.

Ленон со години се каеше за „Mean Mr. Mustard“, па дури и во разговор со Дејвид Шеф, кога зборуваше за песните на „Битлси“.

„Тоа сум јас, пишувам ѓубре“, бесно изјавил тогаш.

А тоа не беше единствениот коментар што го дал за песната. Еднаш морал да го појасни вистинското значење на текстот откако многумина шпекулираа дека станува збор за користење дроги.

Тогаш открил дека инспирацијата дошла од напис во весник: „Прочитав некаде во весник за тој злобен тип што криел банкноти од пет фунти, не во носот, туку некаде на друго место. Не, тоа нема никаква врска со кокаинот“.

Инаку, „Битлси“ имаат историја на погрешно разбрани песни, а Пол Мекартни во бројни интервјуа давал објаснувања за нивното значење, особено за „Can’t Buy Me Love“.