Семето од афион е позната намирница во далечната источна кујна, пакистанска, индиска итн. Нашата земја е позната по одгледувањето на многу квалитетен афион, дури тој е присутен на грбот на државата, како симбол. Сепак, во нашата кујна е малку подзаборавен и покрај богатата хранлива вредност.

Афионовото семе, како и повеќето семиња, содржи висок процент на маснотии, но здрави незаситени маснотии, потоа содржи висок процент на протеини и помалку јаглехидрати. Исто така, микронутритивната вредност е особено богата.

За денес ви предлагаме да подготвите слатки мафини со афион, а овој рецепт нека биде првиот чекор да ја вратиме оваа заборавена намирница во кујната.

Состојки:

За тестото:

– 3 јајца
– 150 rрама
– 100 милилитри масло
– 120 грама брашно
– 150 грама мелено семе од афион
– половина прашок за печиво

За кремот од лимон:

– 3 големи јајца
– 150 грама шеќер
– 2 ќесички ванилин шеќер
– малку сол
– кора од еден лимон
– сок од два лимони
– 50 грама растопен путер

Подготовка:

Одделете ги жолчките од белките. Направете цврста смеса од белките и оставете ја настрана. Додајте шеќер и масло во жолчките и мешајте додека смесата не стане пенеста. Во смесата измешајте ги афионот, брашното и прашокот за печиво. На самиот крај, додајте ги белките и промешајте рачно. Ставете ја смесата во калап и печете околу 20 минути на температура од 180 Целзиусови степени.

Додека се пече тестото, подгответе го кремот. Ставете ги јајцата, шеќерот и другите состојки во сад за готвење. Измешајте ги добро со жица за матење. Ставете ја смесата на тивок оган и мешајте постојано, додека смесата не згусне. Тргнете го тенџерето од огнот и промешајте го растопениот путер додека смесата е топла. Покријте го кремот со фолија и оставете да се излади. Изладените мафини исечете ги на половина, намачкајте го кремот на средина и преклопете ги.

Добар апетит!