Германското министерство за здравство е едно од најмодерните министерства во светот. Не поради фактот што ги имаат едни од најквалитетните лекари во Европа, ниту пак најскапите и најквалитетните апарати кои ги користат лекарите, туку поради тоа што имаат „ТикТок“ профил, и тоа со дури 144 илјади следбеници.

На овој профил, германскиот министер за здравство, Карл Лаутербах, како и многу од познатите германски лекари, објавуваат содржини каде објавуваат препораки како луѓето, претежно младите да се справуваат со болестите, настинките, вирусите кои секогаш се околу жителите и како да се заштитат од нив. Оваа кампања министерството ја започна уште во март 2020 година, кога започнаа да се шират дезинформациите околу ковид-пандемијата.

Борбата против дезинформациите всушност беше првичната причина зошто германското Министерство за здравство го отвори „ТикТок“ профилот, а неговиот подем брзо се почувствува кај младите Германци.

На нивниот профил често се објавуваат видеа под наслов „прашајте го министерот Лаутербах“, каде тој одговара на прашањата кои јавноста ги поставува во коментарите.

@bmg_bund Müssen Krankenhäuser jetzt schließen? Prof. Karl Lauterbach beantwortet die Frage in der neuen Folge #KarlText ♬ Originalton – BMG

Но, ова министерство сега се соочува со еден проблем.

Минатата недела, Европската комисија и Советот на Европа ги повикаа земјите-членки на ЕУ да им наредат на владините функционери и институции да ги избришат „ТикТок“ профилите поради „безбедносни причини“.

Германија, како и останатите земји-членки, го прифати повикот и ги повика институциите да ја избришат кинеската апликација.

Но, германското Министерство за здравство го одбива овој повик. Во нивното соопштение тие наведуваат дека нивниот профил нема политичка позадина, туку служи за да им помогне на младите.

Останатите германски миниистерства имаат поинаков став за оваа проблематика. На пример, германското Министерство за одбрана уште во април 2020 година го забрани „ТикТок“, а некои други, како Министерстото за правда и Министерството за економија, воведоа рестрикции за користење на апликацијата.

„Постои закана дека некои апликации се проблематични да се имаат на службените телефони на функционерите, една од нив е и „ТикТок“, изјави Волфганг Бучнер, рече заменик портпарол на Бундестагот.