Вилијам Шекспир е еден од најважните англиски писатели. Неговите драми се преведени на сите светски јазици и се изведуваат почесто отколку на кој било друг драматург во историјата на светската книжевност.

Шекспир бил почитуван поет и драматург во своето време, но денешниот углед главно започнува во XIX век. Во XX и XXI век, неговите дела уште поинтензивно се проучуваат и изведуваат, од најразлични културолошки, книжевни и политички перспективи ширум светот.

Сепак, ликот и делото на Шекспир се проследени со бројни теории на заговор, а ова се најинтересните и најпопуларните, пишува „Национална географија“.

Сонетите на Шекспир се посветени на мажи

Оваа гласина своевремено успеа да дигне голема прашина. Имено, според професорката Лени Орлин, Шекспир пишувал сонети и за жени, но и за мажи.

„Големиот талент на Шекспир, меѓу другото, се отсликувал и во тоа што тој со својата имагинација умеел да оживее различни ликови, што го правел и во неговите сонети“, вели Орлин, која додава дека сонетите не се љубовни писма што некој ги нашол на таванот, туку се песни кои самиот ги објавувал.

Некои елементи укажуваат на тоа дека некои песни се базирани на неговиот личен живот, но не е утврдено дека Шекспир црпел идеи кога пишувал песни исклучиво од неговиот приватен живот.

„Шекспир понекогаш сакал да им ги посветува своите песни на млади мажи, а понекогаш и на млади жени. Но, иако е тешко да се открие кои се луѓето на кои Шекспир им се обраќал, нема причина да се верува во тоа дека тие навистина постоеле“, вели Орлин.

Шекспир ја мразел својата сопруга Ен Хатавеј

Во 19. век, нашироко се верувало дека Шекспир ја мразел својата сопруга, а причината лежи во неговиот тестамент, во кој Ен Хатавеј се споменува само еднаш.

Имено, Шекспир ѝ оставил на својата сопруга, како што пишува во тестаментот, „second-best bed“ (алудирајќи на измама и нескладен брачен живот), што многу современици го протолкувале како чин на омраза.

Според толкувањето на професорката Орлин, овој термин бил вообичаен за таа ера и многу се користел при пишување тестаменти. Професорката објаснува дека оваа фраза не е погрдна и дека веројатно значела дека парчето мебел ѝ било од посебно значење.

Поддржувачите на теоријата дека Шекспир ја мразел Ен додаваат дека ова е и единственото нешто што Шекспир ѝ го оставил, но Орлин додава:

„Ен имала законско право на третина од неговиот имот, кој го добила по смртта на Шекспир и била многу добро згрижена, нешто што и писателот го знаел“.

Шекспир бил необразован

Иако бил запишан во училиште во родниот Стратфорд на Ејвон, каде учеле само момчиња, чии татковци биле угледни трговци во градот, Шекспир подоцна не го продолжил своето образование. Но, Орлин вели дека тоа не значи дека не добил класично образование.

„Во тоа време дури и основното образование било на латински јазик и засновано на многу строги правила“, вели професорката.

Сигурно се прашувате зошто тогаш се претпоставува дека еден од најистакнатите и највлијателните писатели не бил образован? Па, секогаш ќе има такви кои ќе теоретизираат дека некој што е роден во провинција, како Шекспир, не може да биде автор на такви литературни дела.

Шекспир не е автор на неговите дела

„До 19. век немаше сомнеж дека Вилијам Шекспир е автор на сите негови пишани дела, кога Американката по име Делија Бејкон реши да лансира друга теорија“, објаснува Орлин.

Имено, според Делија Бејкон, англискиот филозоф сер Френсис Беjкон е автор на повеќето дела на Шекспир.

Иако успеала да ја потресе книжевната јавност, теоријата не заживеала, бидејќи има уште околу 80 кандидати и потенцијални автори на делата на Шекспир, меѓу кои и кралицата Елизабета Прва.