Шпанската фудбалерка Ајтана Бонмати по третпат по ред ја освои „Златната топка“, но истакна дека не сака споредби со легендарниот Лионел Меси.

Минатиот понеделник 27-годишната ѕвезда на Барселона ја освои престижната награда пред Алесија Русо (Арсенал) и Мариона Калдентеј. Со тоа стана рекордерка меѓу фудбалерките, пред својата сонародничка Алексја Путељас која има две признанија (2021, 2022).

„Се обидувам да не се споредувам со никого. Меси имаше и сè уште има кариера што за мене е ненадминлива. Јас сум Ајтана, имам свој пат. Не размислувам за осум, ниту за четири трофеи“, изјави Бонмати за ESPN.

Таа нагласува дека успехот е резултат на секојдневна работа, истрајност и жртвување, а не конечна цел. Минатата сезона одигра 58 натпревари за Барселона и Шпанија, со учинок од 21 гол и 15 асистенции, настапи и во финалето на Лигата на шампионите и на Европското првенство.

„Секоја Златна топка е посебна. Оваа година беше најнеизвесна, дури не подготвив ни говор бидејќи имав минимални очекувања. Кога бев мала, едноставно играв затоа што го сакав фудбалот. Никогаш не мислев дека ќе дојдам до три вакви награди“, додаде Бонмати.