Најбогатото семејство „вреди“ четири пати повеќе од Илон Маск и Бил Гејтс заедно
Најбогатото семејство во светот поседува богатство 16 пати поголемо од британското кралско семејство, пишува Дејли експрес.
Се проценува, според Форбс, дека британското кралско семејство вреди близу 69 милијарди фунти (88 милијарди долари), а неговото богатство конкретно доаѓа од имотот – бројни имоти и семејниот бренд.
Препорачано
Вредните имоти ги вклучуваат високо профитабилните војводства Корнвол и Ланкастер, престижниот хотел Савој и Сомерсет Хаус, чија вредност е 652,8 милиони фунти (755,4 милиони долари).
Личното богатство на кралот Чарлс III се проценува на близу 559,6 милиони фунти (772 милиони долари), што го прави 258-ми најбогат човек во Обединетото Кралство.
Но, постои едно кралско семејство чие богатство далеку ги надминува дури и најбогатите луѓе во светот, меѓу кои се Илон Маск и Бил Гејтс.
Куќата на Сауд е владејачко кралско семејство на Саудиска Арабија. Нејзиното богатство се проценува на неверојатни 1,1 трилиони фунти (1,4 трилиони долари).
Најбогатиот човек на светот Илон Маск има нето богатство од 264,8 милијарди фунти (304 милијарди долари), а магнатот на Мајкрософт Бил Гејтс има нето богатство од 81,5 милијарди фунти (105 милијарди долари). Нето вредноста на Куќата на Сауд е толку голема во споредба со британското кралско семејство што се проценува дека е приближно 16 пати поголема, пишува Дејли експрес.
Неверојатното богатство на Саудиска Арабија во голема мера е резултат на огромните резерви на нафта, многубројните големи палати, приватните авиони, врвните јахти и многу профитабилната уметничка колекција.
Како што пишува медиумот, монархиите на Блискиот Исток доживеале експоненцијално зголемување на нивната моќ и богатство во последните 50 години.
Се проценува дека кралското семејство на Саудиска Арабија брои речиси 15.000 членови, а најголем дел од богатството го држат 2.000 роднини. Кралот Салман бин Абдулазиз Ал Сауд формално е глава на семејството и ја има таа титула од почетокот на неговото владеење во 2015 година. Најпознатиот кралски син и престолонаследник е Мохамед бин Салман и тој е де факто владетел на земјата.
Според овој весник, Саудијците во последните години биле многу активни на пазарот во проширување на нивните средства. Францускиот замок Луј XIV беше купен за 235 милиони фунти (300 милиони долари), сликата на Леонардо да Винчи „Salvator Mundi“ за 349,6 милиони фунти (450 милиони долари) и бројни јахти за 392 милиони фунти (500 милиони долари) кои, кога ќе се земе вкупната вредност на ова кралско семејство, изгледа како џепарлак.
