Специјалната проекција на „Молкот на разумот“ на Кумјана Новакова во организација на „Тиииит! Инк.“ ќе се одржи на 12 декември, во 20 часот, во Кино „Фросина“ (Младински Културен Центар).

Станува збор за прва проекција во Скопје на документарниот филм кој освои повеќе значајни награди на реномирани фестивали и е во состав на единаесеттото издание на Фестивалот за феминистичка култура и акција „Прво па женско“.

„Молкот на разумот“ (Silence of reason) е форензички видеоесеј изграден како перформативно истражување на првиот случај на меѓународен кривичен трибунал во кој беа донесени пресуди за воено силување како форма на тортура и за воено сексуално ропство како злосторство против човештвото.

– Базиран исклучиво од форензичка визуелна архива и сведоштва, „Молкот на разумот“ дејствува како меморијата: недостижна, флуидна, надвор од рамките, се движи во сите правци – просторни и временски. Искуствата на насилство и тортура врз жените од логорите за силување во Фоча за време на војната во Босна и Херцеговина стануваат наши колективни сеќавања, надминувајќи ги времето и просторот – стои во најавата на филмот.

„Молкот на разумот“ е добитник на наградата за најдобра режија на програмската секција „Envision“ на Меѓународниот фестивал на документарен филм ИДФА (IDFA) во Амстердам 2023, на наградата за човекови права на Филмскиот фестивал во Сараево 2023, на награда за најхрабар филм на Филмскиот авторски фестивал 2023 во Белград и добива специјално признание на Филмскиот фестивал во Торино 2023.

По проекцијата на филмот ќе следува дискусија водена од филмската критичарка Петра Метерц. Дискусијата ќе се одвива на англиски јазик.

Документарниот филм „Молкот на разумот“ е снимен по сценарио и во режија на Кумјана Новакова, монтажата е на Јелена Максимовиќ, дизајнер на звук е Владимир Живковиќ, а графичкиот дизајн е на Елена Диновска Зарапчиев. Анимациите се на Нувит Бингол. Продуцент на филмот е Кумјана Новакова преку продукцијата „Медеа“ во копродукција со фестивалот „Pravo Ljudski“.

По потекло од Југославија, Кумјана Новакова работи во областа на филмот и уметноста од 2006 година. Таа е коосновач на Филмскиот фестивал „Pravo Ljudski“ во Сараево, каде што е главна кураторка и директорка. Од 2018 до 2021 година го водела и филмското одделение на Музејот на современата уметност во Скопје – МСУ.

Како авторка, нејзиното истражување лежи помеѓу филмот и современата видеоуметност, често истражувајќи како подвижните слики се однесуваат на идентитетите, сеќавањата и колективното јас. Нејзиниот последен филм „Вознемирена земја“ (корежиран со Гилермо Карерас Канди) се квалификуваше за номинација за Оскар. Нејзиниот нов аудиовизуелен уметнички проект „Молкот на разумот“ ги следи искуствата на жените изложени на насилство во време на војната во поранешна Југославија и е награден со уметнички грант од БИРН.

Работи како вонредна професорка на магистерската програма по филм на Холандската филмска академија и следи докторски студии за современи уметности и медиуми во Белград. Кумјана моментално живее меѓу Сараево и Скопје.

Фестивалот „Прво па женско“ е поддржан од „The Kvinna till Kvinna Foundation“, „Equality Fund“, „The Sigrid Rausing Trust“ и Министерството за култура на РСМ.