Нафтените компании може да го искористат растот на цените на нафтата на светските берзи предизвикан од војната во Украина за да го зголемат влијанието кај владите и како клучни креатори на светската политика да имаат директно влијание на климатските промени.

Големите нафтени и гасни компании се полни со готовина што можат да ја искористат за да инвестираат во зголемување на производството од постојните наоѓалишта како и за истражување нови наоѓалишта на нафта и гас.

– Нафтените  компании имаат можност да се репозиционираат како едни од клучните креатори на светската политика – вели Роберт Бакли, шеф за развој на односи во „Корнвол инсајт“, компанија за енергетски анализи.

Поради војната во Украина, цените на нафтата на светските берзи скокнаа на повеќе од 130 долари за барел. Банкарите сметаат дека високите цени на нафтата ќе се задржат подолго време бидејќи Европската Унија, Обединетото Кралство и САД најавија драстични ограничувања за увозот на нафта и гас од Русија, што најмногу ќе влијае на ЕУ бидејќи околу 40 отсто од гасот доаѓа од Русија.

ОПЕК и Саудиска Арабија засега одбиваат да го зголемат производството, но постои можност тоа да се промени бидејќи Обединетите Арапски Емирати се подготвени да го зголемат производството на нафта за 11 отсто.

Нафтената криза им дава можност на нафтените гиганти како „Бритиш петролеум“, „Ројал-дач Шел“, „Ексон-Мобил“ и „Тотал“ да го зголемат влијанието меѓу владите.

– Владите бараат краткорочни решенија за изнаоѓање алтернатива на руските нафта и гас, а Северното Море е логична замена за Обединетото Кралство сè додека не се појават нови извори – смета Робин Бејли од меѓународната адвокатска фирма „Кроуел енд Моринг“.

За да почне производство од новите наоѓалишта на нафта и гас, потребни се неколку години и поради тоа не се очекува намалување на цените на нафтата, барем додека не запре војната во Украина.

Активистите за заштита на животната средина предупредуваат дека нафтените компании ја користат војната во Украина за го зголемат не само профитот туку и влијанието во владите за да остварат поголем профит на сметка на климатските промени.

Експертите предвидуваат дека компаниите ќе го зголемат притисокот врз владите да дадат приоритет на производството на нафта и гас и да ја зголемат употребата на фосилни горива.

– Срамно е што нафтените компании што профитираа од соработката со руските компании, сега се обидуваат да ја искористат кризата за да го зголемат влијанието кај владите за остварување поголем профит – вели Теса Кан, директорка на „Аплифт“, компанија што води кампања за прекин на ископување нафта од Северното Море.

Меѓународната агенција за енергија објави дека емисиите на стакленички гасови покажале досега годишен раст во 2021 година. ИЕА открива дека емисиите на јаглерод диоксид се зголемиле за 6 отсто во 2021 година на 36,3 милијарди тони, што е највисоко ниво досега откако светот беше погоден од пандемијата на ковид-19.

Обновливите извори на енергија и енергетската ефикасност нудат алтернативи за нафтата и гасот, што ги бараат ЕУ, САД и Обединетото Кралство, но доколку нафтените компании успеат да издејствуваат зголемување на производството на нафтата, може да има катастрофални последници за климатските промени, предупредуваат експертите од ИАЕ.