Рафаел Надал е последниот полуфиналист на Вимблдон откако во четвртфиналето го совлада Тејлор Фриц со 3:6,7:5,3:6,7:5,7:6.За пласман во финалето, Надал ќе игра со Ник Кирјос кој претходно во три сета го победи Кристијан Гарин.

Шпанецот кој триумфираше на Австралија Опен и Ролан Гарос, освен против расположениот американски тенисер мораше да се бори и со болките во стомакот поради кои побара медицински тајм-аут по завршувањето на првиот сет.

Дека мечот ќе биде тежок за Шпанецот можеше да се види уште во првиот сет иако тој прв направи брејк и поведе со 3:1.Но потоа следеше серија на Фриц од пет освоени гема по ред за 3:6 и водство од 0:1 во сетов.

Во паузата меѓу два сета, Надал за првпат бара медицински тајм-аут поради болките во стомакот, но и тоа не го спречи да возврати и да слави со 7:5 за 1:1 во сетови.

Во третиот сет, повторно Фриц одигра одлично, не му дозволи на Надал да направи брејк, а притоа тој два пати го одзеде сервисот на Шпанецот за 3:6. Потоа во паузата меѓу третиот и четвртиот сет, Надал повторно побара медицински тајм-аут и по враќањето играше подобро.

Четвриот сет започна со брејк на Надал, но Фриц возврати со ри-брејк. Надал не се предаде и повторно прави брејк за 2:1 и предноста ја одржуваше до осмиот гем кога Американецот повторно прави брејк за 4:4. Потоа двајцата тенисери беа сигурни во следните два сервиси, се до 11 гем кога Шпанецот прави брејк за 6:5 и потоа со добар сервис дојде до 7:5 и израмнување на 2:2 во сетови.

Во одлучувачкиот сет, Надал прв направи брејк во седмиот гем за 4:3, но Фриц експресно возврати во наредниот. Потоа двајцата тенисери беа сигурни на свој сервис и мечот го однесоа во тај-брејк во кој Шпанецот доминираше, поведе со 5:0 и потоа рутински дојде до 10:6 за триумф и пласман во полуфинале каде го чека Кирјос.

Полуфиналните дуели во машка конкуренција меѓу Надал-Кирјос и Ѓоковиќ-Нори ќе се играат в петок.