Повеќе од 80 отсто од жителите на Тувалу, пацифички островски архипелаг кој е директно загрозен од порастот на нивото на морето, побарале визи за преселба во Австралија, согласно договорот за климатска миграција потпишан меѓу двете земји во 2024 година, пишува Франс24.

Австралиската дипломатска мисија во Тувалу соопшти дека до сега биле поднесени 8.750 регистрации за виза, што претставува 82 проценти од вкупното население на архипелагот, кое според пописот од 2022 година брои 10.643 жители.

Овој договор, кој Канбера го нарече „прв од ваков вид во светот“, е замислен како хуманитарен одговор на заканите од климатските промени кои го загрозуваат опстанокот на малите островски држави. Во рамките на програмата, Австралија оваа година нуди само 280 визи, што значи дека огромното мнозинство на апликантите нема да можат веднаш да ја искористат оваа можност.

Тувалу е една од најизложените земји на ризик од покачување на морското ниво и климатска нестабилност, со ограничени можности за адаптација и долгорочна одржливост.