Традиционалниот настан кој ги слави врвните ресторани во Лос Анџелес оваа година помина неславно – најмалку 80 луѓе се затруле со храна откако им биле послужени остриги контаминирани со норовирус, објави „Еј-би-си“, повикувајќи се на Одделот за јавно здравје на округот Лос Анџелес.

Масовното труење се случило во „Холивуд Паладиум“, на настан на кој се доделуваат признанија за врвни кулинарски дострели, а весникот „Лос Анџелес Тајмс“ ја претставува својата листа на 101 најдобар ресторан во американската метропола.

„Во овој момент, над 80 присутни кои консумирале школки пријавиле симптоми“, соопшти на Одделот за јавно здравје на округот.

Властите издадоа наредба за повлекување на остригите кои биле набавени од две фирми, а ги предупредија купувачите да не ги користат производите од конкретните серии на пакување.

Норовирусот е многу заразен вирус кој предизвикува повраќање и пролив и најчесто се нарекува „стомачен грип“, според Центарот за контрола и превенција на болести. Тој е водечка причина за болести предизвикани од храна во САД. Други симптоми може да вклучуваат стомачна болка, треска, главоболка, болки во телото или дехидрација. Правилното миење на рацете, дезинфекција на контаминирани површини, перење алишта во топла вода и останување дома кога се болни се начини да се спречи понатамошно ширење.

Билетите за традиционалниот настан и вечерата на која се случило труењето чинеле од 246 до над 600 долари.