Над 300 луѓе низ Франција пријавиле дека биле избодени со игла додека присуствувале на забави во ноќни клубови или концерти. Сè започна пред неколку месеци, а надлежните не знаат кој и зошто го прави тоа и дали на жртвите им била подметната дрога. Слична ситуација се случува и во Белгија, Холандија и Велика Британија.

На почетокот на мај, 18-годишниот Томас Локс бил на концерт во северна Франција. Кога се вратил дома, почувствувал вртоглавица и главоболка, а забележал чуден убод на раката и модринка, пренесува НПР. Ден потоа, тој сè уште имал симптоми, а лекарот во локалната болница го пратил на подетални прегледи. Потоа било потврдено дека тој бил избоден со игла и бил тестиран за ХИВ и хепатитис. На негова среќа, неговите резултати биле негативни.

„Престанав да одам на концерти откако се случи тоа“, рече Лакс.

Леан Деснос (18) е уште една жртва. Во април таа била во ноќен клуб во Бордо. Неколку часа по забавата таа се онесвестила. Кога стигнала дома, забележала убод на раката.

Ниту една жртва не пријавила сексуален напад

Луѓето од Париз, Тулуз, Нант, Нанси, Рен и други градови низ Франција пријавиле дека биле избодени со игла без нивно знаење или дозвола. Целите, главно жени, покажуваат видливи знаци на убоди, модринки и симптоми како што се замор.

Француската национална полициска агенција соопшти дека 302 млади поднеле официјални пријави за такви убоди од игла. Во тек се неколку полициски истраги во различни региони, но се уште нема уапсени.

Ниту една жртва не пријавила сексуален напад. Додека посетителите на клубот изразуваат страв на социјалните мрежи и медиумското покривање ја зголемуваат вознемиреноста, француското Министерство за внатрешни работи започна национална кампања за подигање на свеста за настаните.