На социјалните мрежи кружи фотографија со фискална сметка од објектот „Златарски златник“ на Златибор во соседна Србија каде што на гости во ресторанот им било наплатено за престојот на нивното домашно милениче на маса и тоа во висина од 500 динари, односно четири евра. Српските медиуми јавуваат дека на влезот од ресторанот на вратата стоело известување во кое пишува дека ќе се наплаќа за влез на домашно милениче во објектот.

„На вратата има јасно известување дека секој што има домашно милениче и ќе го донесе во ресторанот, ќе треба да плати 500 динари. Моравме да ја донесеме оваа одлука бидејќи кучињата седат на фотелји, гребат и скокаат. Моравме да ги заштитиме гостите кои беа против тоа“, изјавија од ресторанот за Н1.

Vodite računa gde sedite, imamo novi trend! Naplata boravka kućnog ljubimca u kafiću/ restoranu! Izbegavati!!! pic.twitter.com/BcUbec1ASQ

— IzVesna (@izvesnavesna) July 22, 2024

Од ресторанот појаснуваат дека сепак е дозволено носење миленичиња, но под одредени услови.

„Гостите кои доаѓаат со домашни миленици обично не прашуваат дали можат да влезат со нив. Случајот со госпоѓата за кој реагираше домашната јавност е интересен бидејќи таа не праша дали смее да го внесе своето куче во ресторанот. Таа прво го скри кучето, а тоа подоцна скокна“, изјавиле за Н1 од ресторанот „Златарски златник“.