На животните во Украина им даваат седативи за да преживеат, некои умираат од срцев удар
Додека околу еден милион луѓе досега ја напуштија земјата, многу Украинци деноноќно работат за да ги спасат и животните во зоолошките градини и во засолништата, предупредувајќи дека на животинскиот свет во Украина исто така му се заканува геноцид од бомбардирањата.
Препорачано
Бидејќи на удар на ракетите или на изгладнување се и фармите за одгледување кокошки, свињи, крави и друга стока во кои има милиони животни – најавуваат можна еколошка катастрофа. Во засолништата блиску до фронтот, кои се соочени со редовни гранатирања, на кучињата и на дивите животни, според сведоштвата, им даваат средства за смирување – за да преживеат од стресовите. Некои од нив, според сведоштвата, умираат од срцев удар.
Зоолошката градина во Киев има 4.000 животни од над 200 видови, вклучувајќи слонови, камили и единствената горила во Украина, Тони. Вработените во зоолошката градина велат дека можноста за евакуација на животните е пропуштена.
„Речиси е невозможно да се евакуираат животните, бидејќи е невозможно да се обезбеди соодветна ветеринарна услуга и транспорт“, вели Кирило Трантин, шеф на зоолошката градина.
Тој алармира дека снемуваат храна и вода и дека резервите им се за десетина дена. Откако неделава во Киев беше бомбардирана зоолошката градина, животните се сега безбедно пренесени во зоолошката во Познан, Полска. Екипа од оваа градина четири дена работеше на евакуацијата на дел од животните и тие вечера вечерта ја преминаа украинско-полската граница. Во текот на спасувачката мисија, екипата и животните поминале низ најризичните воени зони во земјата. Поддршка за нивниот подвиг пристигна од многу страни, а луѓето прашуваа каде може да донираат пари или храна за животните.
Во изминатите четири дена, екипата од зоолошката постојано пишуваше за сè што им се случува по патот, за предизвиците со кои се соочиле и како реагирале животните. Велат, сите заедно преживеале голем стрес, но стигнале на безбедно на крајната дестинација.
„Конечно стигнавме во Познан од Киев. По долгото патување, ги сместивме животните во нашата зоолошка, им дадовме храна, и сега сите заслужуваме малку одмор. Од утре почнуваме со нова мисија, да ги прилагодиме на новата средина во којашто дојдоа, но знаеме дека ќе успееме“, напишаа на Фејсбук од зоолошката.
