Хуманитарен музички настан со наслов „Кочани за Кочани“ на 21 јуни, со почеток во 20 часот, ќе се одржи на Споменикoт на слободата во Кочани. Тоа ќе биде прв културен настан во Кочани по големата трагедија во дискотеката „Пулс“.

– Важно е за нас музичарите од Кочани да направиме нешто добро преку својата музика и хуманост знаејќи дека блиските кои ги изгубивме, најмногу нѐ сакаа таму – на сцена. Во овие тешки времиња потребен е дел од фокусот да го ставиме и на живите, да им бидеме утеха, прегратка, но и потсетник дека не се сами. Во времиња во кои мора да бидеме што е можно повеќе сплотени, музиката е најважниот инструмент за да го постигнеме тоа.

Посебно би сакале да ги поканиме матурантите од Кочани, од таму ни тргна и целата оваа идеја за хуманитарен музички настан. Како што знаете, тие оваа година нема да ја прослават својата матура, но ние не сакаме тишината да ја обвие нивната младост.

Ова не е плитка забава, бидејќи нашите срца се сѐ уште во тага, но музиката не е само веселба – таа е бунт, солидарност и храброст за некои работи никогаш да не се заборават и никогаш да не се повторат – истакнуваат организаторите на настанот.

На хуманитарниот концерт ќе настапат: „Без Памет“, „Поетроника“ со Благој Веселинов и Наталија Теодосиева, проект „Коч-Ан“, „90ty Strings“, „Корка“, Мартикс, диџеј Џани Филипо. Влезот на настанот е слободен.