На поранешниот холивудски продуцент Харви Вајнштајн му била дијагностицирана хронична миелоидна леукемија, пренесува „Еј-би-си њуз“ (ABC News). Тој моментално се наоѓа на лекување од овој тип на рак на коскената срцевина. Харви, кој моментално отслужува затворска казна за силување, дознал за неговата дијагноза претходно овој месец, како што објави „Њујорк пост“ (The New York Post).

Неговите претставници прво негираа дека има рак, но подоцна мораа да се огласат поради различни шпекулации за неговата здравствена состојба.

„Вознемирувачко и неприфатливо е таквите приватни и доверливи здравствени прашања да станат предмет на јавен дискурс. Од почитување на приватноста на г-дин Вајнштајн, нема да коментираме понатаму“, рекоа неговите претставници.

Патем, Вајнштајн заврши на итна операција на срцето на почетокот на септември, откако доживеа срцева болка. Покрај тоа, тој боледува од дијабетес, висок крвен притисок, спинална стеноза, течност во срцето и белите дробови, а се борел и со коронавирусот и пневмонијата.