Инфлуенсерката Алиша Барни, која доби милиони следбеници на Јутјуб и ТикТок благодарение на нејзините вирални пародии, почина во сон на 2 март додека беше на одмор во Кабо Сан Лукас, Мексико, потврди нејзиниот брат Чарлс. Таа имаше само 25 години.

„Со голема тага објавувам дека почина мојата помлада сестра Алиша Барни“, напиша Чарлс во изјавата објавена на Инстаграм. „Ве молиме да му дозволите на нашето семејство да тагува во ова тешко време“, додаде тој. Официјалната причина за смртта сѐ уште не е објавена.

Во својата објава, Чарлс решително ги отфрли сите неосновани гласини кои почнаа да се шират за околностите на смртта на неговата сестра.

„Исклучително е тешко да се гледаат сите овие лажни приказни кои се обидуваат да го оцрнат нејзиното наследство. Подготвени сме да преземеме правни мерки против секој кој продолжува да шири лажни информации за нејзината смрт“, додаде тој.

На крајот од пораката, Чарлс им се заблагодари на сите што покажаа поддршка во овој предизвикувачки период, нагласувајќи колку му е потребна приватност на неговото семејство додека тагува по Алиша.

„Знаеме колку луѓето ја сакаа и ценеа. Наскоро ќе споделиме повеќе информации, но ве молиме дајте ни малку време и престанете да го вознемирувате семејството“, заклучил тој.

Алиша ја започна својата кариера на Јутјуб во февруари 2013 година. Таа беше продуцент, режисер и комичар специјализиран за кратки скечеви, а нејзиниот канал собра повеќе од 1,2 милиони претплатници. Таа има повеќе од 2,4 милиони следбеници на TикТок.