На повидок скандал: Големиот талент на Борусија Дортмунд ги лажирал своите години?
Германските медиуми објавија сомнежи за возраста на напаѓачот на Борусија Дортмунд Јусуфа Мукоко кој официјално има 18 години.
Препорачано
Медиумите во Германија се сомневаат дека младиот талент на „милионерите“ е за четири години постар отколку што се претставува. Се започнало уште летото минатата година кога посвоителот на Мукоко на еден новинар му испратил извод од книга на родените според кој фудбалерот има 22 години.
Сега оваа тема е повторно актуелна само неколку дена откако беше откриен големиот скандал со репрезентацијата на Камерун до 17 година.
Минатата недела во текот на припремите на камерунската репрезентација до 17 години беше откриено дека дури 21 од 30 пријавени фудбалери немаат право за настап за тој тим затоа што се постари. Селекторот Жан Пјер Фиала брзо реагираше и го промени составот. Но, проблемите не застанаа тука затоа што и помеѓу новите повикани фудбалери имаше уште 11 кои се престари за тој тим.
Инаку, не е првпат Мукоко да биде под сомневање дека си ги фалсификувал годините. Уште во 2017 година имаше вакви информации, но тогаш германската федерација излезе со потврда дека фудбалерот е роден 20. ноември 2004 година.
